Bu yil Oʻzbekistonda 330,5 ming gektardan ortiq maydonga dukkakli ekinlar ekildi, deb xabar bermoqda «Dunyo» axborot agentligi muxbiri Qishloq xoʻjaligi vazirligi maʼlumotlariga tayangan holda.
Shundan 35,8 ming gektari loviyaga toʻgʻri keladi, bu oʻtgan yilgidan 5,9 ming gektar koʻpdir. Loviya 5,1 ming gektarga asosiy ekin sifatida, 24,5 ming gektarga takroriy ekin sifatida, shuningdek, 6,1 ming gektar bogʻ qatorlari orasiga ekilgan. Bugungi kunda bu ekin Andijon, Jizzax, Namangan, Samarqand, Toshkent, Qashqadaryo, Fargʻona, Sirdaryo va Surxondaryo viloyatlari dehqonlari tomonidan yetishtirilmoqda.
Loviyaning oʻsish davri qisqa boʻlgani bois Oʻzbekiston sharoitida uni yiliga ikki marta yetishtirish mumkin. Xususan, uni erta bahorda asosiy ekin sifatida, bahorgi boshoqli ekinlardan boʻshagan maydonlarga esa takroriy ekin sifatida ekish tavsiya etiladi.
Loviya — toʻyimli va mazali mahsulot. Urugʻlari va pishmagan qoʻzoqlari pishirilgan holda isteʼmol qilinadi hamda konserva sanoatida ishlatiladi. Loviya yuqori kaloriyaga ega boʻlib, boshqa dukkakli ekin turlariga nisbatan koʻproq oqsil saqlaydi.
