Oʻzbekistondan Niderlandiyaga 54 000 AQSh dollarlik yeryongʻoq yetkazib berildi, deb xabar qilmoqda «Dunyo» axborot agentligi muxbiri.
Oʻzbekistonning Benilyuks mamlakatidagi elchixonasi maʼlumotlariga koʻra, yetkazib beruvchi — Markaziy Osiyoda dukkakli ekinlar, quritilgan mevalar va yongʻoq mahsulotlarini ishlab chiqarish va eksport qilishga ixtisoslashgan Global Export kompaniyasi. Tashkil etilganiga koʻp vaqt oʻtmagan boʻlsa-da, kompaniya allaqachon dunyoning 20 dan ortiq mamlakatidagi kompaniyalar bilan mustahkam hamkorlik aloqalarini oʻrnatgan, bu esa Global Export ishonchli qishloq xoʻjaligi mahsulotlari ishlab chiqaruvchisi va yetkazib beruvchisi sifatida jahon miqyosida eʼtirof etila boshlaganidan dalolat beradi.
Yevropalik hamkorlar tomonidan eʼtirof etilishi — kompaniya mahsulotlari sifatining shubhasiz isbotidir. Jumladan, oʻtgan yilning iyun oyida Global Export Oʻzbekiston elchixonasi koʻmagida ilk bor dukkakli mahsulotlar (loviya, mosh) eksportini Niderlandiya va Belgiyaga yoʻlga qoʻydi. Bunga kompaniya korxonalarida Oʻzbekiston Investitsiyalar va tashqi savdo vazirligi huzuridagi Eksportni qoʻllab-quvvatlash agentligining moliyaviy koʻmagida xalqaro oziq-ovqat xavfsizligi standarti (FSSC 22000) joriy etilgani ham imkon berdi.
Yana bir yorqin misol — yeryongʻoqning Niderlandiya bozoriga ilk eksporti boʻlib, u yirik distribyutorlik kompaniyasi bilan 1 million AQSh dollariga tuzilgan shartnoma doirasida amalga oshirilmoqda.
